Явне комуналне подприємство „Водовод и канализация” Нови Сад, без огляду на епидемиолоґийну ситуацию и очежани условия роботи, реализовавало числени плановани инвестициї. Предлужело ше робиц на вибудови и опреманю новей главней пумпней станїци (NGC1) хтора би мала заменїц иснуюци два станїци. Шлїдуюца фаза то вибудов и повязованє колектору канализациї медзи обєктами NGC1, на углє Роботнїцкей улїци и Кейом, и NGC1 хтори ше будзе робиц з тунелованьом. После того ше обєкт GC1 загаши, а вец шлїдзи вибудов поцисного канализацийного цивоводу през Жежельов мост по локалитет будуцого централного построєня за пречисцованє одрутних водох. Предлужени виробок технїчней документациї за вибудов Цетралного построєня за пречисцованє одрутних водох Нового Саду того року вошол до фази виробку студиї виводлївосци з идейним проєктом, за цо обезпечени средства зоз Европскей униї. У Буковцу за другу висинску зону вибудовани резервоар з волуменом 150 кубни метери, з гидрофилним построєньом, з чим оможлївене приключованє шицких леґалних обєктох у тей зони, а цо ище важнєйше, прицисок води злєпшани. Закончена и станїца за дехлорованє води за пице у Ковилю, а з реализацию тей инвестициї потерашню методу дезинфекциї хлорованя з ґазовим хлором ше заменює зоз сиґурнєйшу методу дезинфекциї з натрий хипохлоритом. Вибудовани и маґистрални цивовод од Руменацкей драги у Новим Садзе по улїцу Иво Лола Рибар у Ветернику и праве з тима роботами значно дзвигнути квалитет водоподмирйованя населєня Ветерник. У наступним периодзе ше закончи будованє канализациї похаснованей води, з провадзацима обєктами, од локалитету восточно од Зренянинскей драги по улїцу Байчи Жилинского у Новим Садзе. По тераз вибудовани колекторски напрям, як и пумпна станїца од винїмковей значносци за зберанє одрутних водох у тей часци городу, на хтору ше повяже и населєня Будисаву и Кать. У старей филтер-станїци закончена санация филтерних польох 7 и 12, а почати и роботи и на санациї польох 4 и 8. Тиж, предлужени роботи на санациї и реґенерациї студньох на жридлє новосадского водоводу. Закончени роботи на санациї студньох з горизонталнима дренами, з уцискованьом нових дренох на BHD-5 и BHD-8 на жридлє „Воєне острово”. З тима роботами звекшани капацитет студньох сировей води, а з уцискованьом нових дренох зоз прохромского челїку предлужени вик тирваня студньох 50-100 роки. Закончени роботи и на реґенерациї студньох BHD 4 и BHD 10 у жридлє „Воєне острово”, як и роботи на реґенарациї студньох BHD 3 и BHD 8 на жридлє „Петроварадинска ада”. Предлужело ше з роботами на повязованю Беґечу на водоводну систему (I фаза) на часци драги коло Ветернїцкей улїци у Адицох и Дунайскей улїци у Ветернику, з повязованьом на Новосадску драгу. З реализацию того проєкту населєнє Беґеч би ше у наступним периодзе приключело на водоводну систему городу. Закончени и роботи на реконструкциї компресорного построєня PS Лиман, потим и перша фаза роботох на будованю водоводней и канализацийней мрежи у населєню Юґовичево. Медзи найзначнєйшима роботами вшелїяк и вибудов водоводней мрежи у вецей як 25 улїцох у населєню Сайлово.
